بم سے اُڑادینے کی دھمکی دینے والے ملزم کی جانچ ضروری

ناندیڑ: ۸؍مئی (اعتمادنیوز)ناندیڑ شہر کے مشہور و معروف گرودوار ہ اور ریلوے اسٹیشن کو بم سے اُڑادینے کی دھمکی کا ایس ایم ایس شری کانت جناردھن بھوسلے (۲۴سال ) ساکن کومٹھے گاؤں ضلع ساتارا نے روانہ کرکے دہشت مچادی تھی ۔ اس ملزم کو پولس نے گرفتار کیا ہے جو فی الحال پولس کسٹڈی میں ہے ۔ ملزم کو بچانے کیلئے کچھ لوگ اُسے دماغی مرض میں مبتلاء بتارہے ہیں ۔ اس تعلق سے آج راشٹروادی یوتھ کانگریس کیشہر صدر فیروز لالہ ، منبیر سنگھ گرنتھی ، اقلیتی شعبہ کے



ضلع صدر محمد زبیر احمد ، شری دھر ناگا پور کر ، روہت ٹھاکور نے ایڈیشنل ایس پی سے ملاقات کی اور انہیں میمورنڈم پیش کیا ۔ راشٹروادی کانگریس پارٹی کی جانب سے مطالبہ کیا گیا ہے کہ یہ معاملہ بہت ہی سنگین ہے ۔ اس لئے اس کی تحقیقات اے ٹی ایس کے سپرد کی جائے ۔ اگر واقعی شری کانت بھوسلے دماغی طورپر متاثر ہو تو اُسے فوری پاگل خانہ روانہ کرکے اُس کا علاج کیا جائے ۔ میمورنڈم میں مطالبہ کیا گیا کہ اس ملزم کی غیر جانبدارانہ تحقیقات کرکے معاملہ کا پردہ فاش کیا جائے ۔